Aðeins Jón Arnar hefur náð betri sjöþraut en Einar Daði í gær

ÍR-ingurinn Einar Daði Lárusson náði næstbestu sjöþraut Íslendings innanhúss í sjöþrautakeppni sem fram fór á mánudag og þriðjudag í Laugardalshöllinni. Einar Daði hlaut samtals 5567 stig en bestan árangur Íslendings á Jón Arnar Magnússon sem náði 6293 stigum á HM í Maebasi í Japan árið 1999.

Einar Daði hefur verið að standa sig vel á innanhússtímabilinu þótt að hann hafi ekki náð að klára þrautina á Íslandsmeistaramótinu á dögunum. Þá var hann með 3133 stig eftir fyrridaginn en hann var með 3184 stig eftir fyrri daginn á þessu móti.

Einar Daði hljóp á mánudaginn 60 metrana á 7,09 sek sem gefa 851 stig. Þetta er hans næst besti árangur í greininni. Hann stökk 7,38 metra í langstökki sem gefur 905 stig. Kúlunni varpaði hann 12,30 metra sem skilaði 625 stigum. Loks fór hann 2,00 metra í hástökki sem gefur 803 stig. Eftir fyrri dag hafði hann samtals 3184 stig.

Í gær hljóp Einar Daði 60 metra grindahlaupið á 8,32 sek (hans þriðji besti árangur) sem gefur 903 stig, fór yfir 4,40 metra í stangarstökki sem gefur 731 stig og hljóp síðan 1000 metra hlaup á 2:51,59 mínútur sem gaf honum 749 stig.

„Einar er greinilega greininlega í miklum bætingarham og verður fróðlegt að sjá hvað sumarið ber í skauti sér en miðað við að meðaltali, rétt um 800 stig í hverri grein, ættu 8000 stigin í tugþraut ekki að vera langt undan," segir í frétt um Einar Daða inn á heimasíðu ÍR.

Árangurs Einars Daða á sjöþrautarmótinu:60 metra hlaup: 7,09 sekúndur (næstbesti árangur) - 851 stig

Langstökk: 7,38 metrar (bæting um 8 cm) - 905 stig

Kúluvarp: 12,30 metrar (besti árangur í þraut) - 625 stig

Hástökk: 2,00 metrar (annar besti árangur) - 803 stig

60 metra grindahlaup: 8,32 sekúndur (þriðji besti árangur) - 903 stig

Stangarstökk: 4,40 metrar - 731 stig

1000m hlaup: 2:51,59 mínútur - 749 stig