Spánverjar vilja framseljanlegan kvóta

Samtök spænskra útgerðarmanna (CEPESCA) telja að framtíðarfyrirkomulag fiskveiðistjórnunar innan Evrópusambandsins muni byggjast á framseljanlegum aflaheimildum í samræmi við reglur innri markaðar sambandsins.

Fjallað er um málið á vefsíðu LÍÚ. Þar segir að hugsanlegar breytingar í þessa veru voru ræddar á aðalfundi Europesche sem haldinn var nýlega í borginni Cadiz á Spáni. Á aðalfundi Europesche, sem eru samtök útgerðarfyrirtækja innan Evrópusambandsins, voru rúmlega 30 fulltrúar útgerðarfyrirtækja frá tíu aðildarríkjum ESB.

Í ályktun CEPESCA er áréttað, að við endurskoðun fiskveiðistefnu ESB sé nauðsynlegt að ákvarðanataka færist í auknum mæli frá efsta lagi stjórnsýslu sambandsins heim til  fiskveiðiþjóða. Þá þurfi að koma á virku samráði svæðisbundinna stjórnvalda, vísindamanna og þeirra sem starfa í sjávarútvegi um ákvarðanir og leiðir við stjórn veiða. Greint er frá þessu á vefsíðunni fis.com.