Mercedes Formúlu 1 liðið jákvætt og í baráttuhug þrátt fyrir erfiða byrjun

Nico Rosberg hjá Mercedes liðinu náði þriðja sæti í Formúlu 1 mótinu í Malasíu í fyrra og mætir þangað á nýjan leik, ásamt liðsfélaganum Michael Schumacher um aðra helgi. Mercedes liðinu gekk ekki vel í fyrsta móti ársins. Báðir ökumenn féllu úr leik eftir árekstur.



Sepang brautin sem keppt er á í Malasíu, er uppáhaldbraut Rosbergs og Schumacher lítur á hana sem einn af heimavöllum Mercedes.



„Sepang brautin er uppáhaldsbrautin mín á mótaskránni í Formúlu 1. Hún er hröð og erfið viðureignar, skemmtilega löguð og með blandaða útgáfu af beygjum, sem gerir hana spennandi að fást við. Ég hef góða tilfinningu fyrir því að mæta til leiks á ný og vonast til að ná góðum árangri á heimabraut styrktaraðila okkar", sagði Rosberg í fréttatilkynningu frá Mercedes í dag, en olíufyrirtækið Petronas er frá Malasíu og styrkir Mercedes liðið.



Bæði Rosberg og Schumacher féllu úr leik í fyrsta móti ársins í Ástralíu, en Rubens Barrichello hjá Williams ók á Rosberg og bíll hans bilaði. Schumacher hafði áður fallið úr leik í mótinu eftir að ekið var aftan á bíl hans. Afturdekk sprakk og bíll Schumacher skemmdist líka.



„Mótið í Ástralíu var erfitt, en við höfum trú á bílnum í Malasíu. Ég hef trú á því að við getum komið á óvart. Við vitum að bíllinn er fljótur, ef tekið er mið af æfingum í Barcelona (á Katalóníu brautinni í vetur) og við þurfum að sanna hvað býr í bílnum", sagði Rosberg.



Schumacher segist líta á mótið í Malasíu sem einn af heimavöllum Mercedes og liðið njóti stuðnings heimamanna vegna tengslanna við Petronas.



„Brautin er frábær og gefur ýmsa möguleika hvað aksturslínur varðar í sumum beygjum. Slíkt er varla til staðar á öðrum brautum. Ég hef alltaf kunnað vel við að aka þarna og hlakka til þess á ný", sagði Schumacher.



„Við viljum gera betur en í fyrsta móti ársins, sem var vonbrigði fyrir okkar alla. Við þurfum að mæta erfiðleikunum og það er of snemmt að afskrifa okkur. Það eru allir jákvæðir og í baráttuhug. Ég býst við betri mótshelgi næst, sem má fylgja efir", sagði Schumacher.