Boateng verður áfram hjá Milan

Ferill Ganamannsins Kevin Prince-Boateng hefur verið afar sérstakur. Hann fór frá Portsmouth yfir til ítalska liðsins Genoa þar sem hann var lánaður til besta liðs Ítalíu, AC Milan.

Þar hefur hann staðið sig nokkuð vel og nú er ljóst að hann verður áfram í láni hjá Milan á næstu leiktíð.

"Boateng hefur átt frábært tímabil. AC Milan vill endilega halda honum og því kemur hann ekki til Genoa í sumar," sagði Enrico Preziosi, forseti Genoa.

Boateng hefur spilað 28 leiki fyrir Milan í vetur og skorað þrjú mörk.