Forstjóri Iceland í vandræðum í Nepal eftir slys

Ganga Malcolm Walker forstjóra Iceland verslunarkeðjunnar á Evrest fjall er komin í óvissu. Vörubíll með megnið af búnaði göngumannanna hrapaði niður í gil í Nepal í gærdag þannig að búnaðurinn eyðilagðist.

Samkvæmt fréttum í breskum fjölmiðlum varð slysið nálægt landmærum Nepal og Tíbet. Þrír menn voru um borð í bílnum og náðu þeir að stökkva úr honum áður en hann hrapaði alla leið niður í gilið. Tveir þeirra eru illa slasaðir eftir slysið.

Malcolm Walker ætlaði sér að afla einnar milljón punda með göngu sinni í þágu góðgerðarsamtaka sem berjast gegn alzheimer. Þrítugur sonur Walker er með honum í ferðinni.

Walker segir í samtali við vefsíðuna thisisbath að vörubíllinn sé gjöreyðilagður og að allur búnaður þeirra hafi dreifst um gilið. Þeir verði því að reyna að útvega sér búnaðinn að nýju og koma honum í grunnbúðirnar við Everest (Everest Base Camp) ef fjallganga þeirra á að halda áfram. Alger óvissa ríkir um hvort þetta takist.