Mourinho ætlar sér aftur til Inter, en ekki strax

Jose Mourinho, knattspyrnustjóri Real Madrid, sagði við ítalska blaðið Gazzetta dello Sport að allar þær sögusagnir um það að Portúgalinn væri á leiðinni til Inter strax aftur á næsta tímabili væru úr lausu lofti gripnar.



„Ég mun einn daginn vinna aftur fyrir Inter en það verður ekki á næsta tímabili,“ sagði þessi snjalli stjóri.



Jose Mourinho vann Meistaradeild Evrópu og tvo ítalska meistaratitla á þeim tveimur árum sem hann var við stjórnvölin hjá Inter.



Ítalskir fjölmiðlar hafa skrifað mikið um mögulega endurkomu Mourinho, en nú hefur hann tekið af allan vafa. 



„Nú verður fólk að hætta að velta þessu fyrir sér. Inter hefur sérstakan stað í hjarta mínu og ég mun án efa starfa aftur fyrir félagið, en ekki á næsta tímabili,“ sagði Jose Mourinho við Gazzetta dello Sport.