Sjóræningjar kosta Mærsk um 20 milljarða í ár

Allt bendir til þess að sjóræningjastarfsemi undan ströndum Sómalíu muni kosta danska skipafélagið Mærsk hátt í 200 milljónir dollara, eða um 20 milljarða kr. í ár. Þetta er tvöfalt hærri upphæð en Mærsk þurfti að greiða vegna sjóræningja á síðasta ári.

Fjallað er um málið á Bloomberg fréttaveitunni. Þar segir að þessi aukakostnaður Mærsk felist einkum í því að skipafélagið þarf að sigla lengri leiðir framhjá aðalathafnasvæði sjóræningjanna og þar að auki að nota stærri og hraðskreiðari skip sem erfiðara er fyrir sjóræningjana að ráða við. Þetta samanlagt hækkar verulega eldsneytiskostnaðinn hjá Mærsk.

Erik Rajberg forstjóri skipaflutninga á Mærsk segir að sjóræningjastarfsemin hafi aukið kostnaðinn hjá öllum skipafélögum sem siglt hafa undan ströndum austurhluta Afríku. Nokkur félög hafi alfarið hætt að sigla á þessum leiðum og ef sjóræningjastarfsemin aukist muni fleiri skipafélög hætta þessum siglingum. Í staðinn munu þau sigla suður fyrir Afríku með tilheyrandi kostnaðarhækkunum.

Fari svo að Mærsk velji að sigla suður fyrir Afríku í stað þess að sigla um Súez skurðinn þýðir það að skip sem fer frá Singapore til Spánar verður 27 daga á leiðinni sem er aukning um 10 daga á þessari leið.