Annasamur tími framundan hjá nýliðanum

Belginn Jerome d'Ambrosio hjá Virgin Formúlu 1 liðinu telur að næstu næstu tvær vikur verði spennandi í augum áhorfenda, en keppt verður á Spáni um næstu helgi og í Mónakó helgina eftir. Hann hóf að keppa í Formúlu 1 á þessu keppnistímabili og ekur með Timo Glock í liði Virgin sem er að hluta til í eigu Marussia bílaframleiðandans í Rússlandi.

„Katalóníu brautin er ein af uppáhaldsbrautum mínum, þar sem ég hef oft keppt þar. Það er gott fyrir ökumenn þegar þeir þekkja brautirnar. Við æfðum þarna í upphafi tímabilsins, en engu að síður þarf að stilla bílunum upp fyrir brautina miðað við aðstæður. Dekk geta virkað vel í eitt skipti, en svo síður í það næsta. Það er annasöm vika framundan, þar sem spænski kappaksturinn er vikuna á undan mótinu í Mónakó. Það eru því tvær frábærar F1 1 vikur framundan fyrir áhorfendur", sagði d'Ambrosio.

Timo Glock telur brautina í Katalóníu eina af þeim bestu, ekki síst í ljósi þess að ökumenn hafa keppt og æft á brautinni oft.

„Brautin er blanda af mörgum þáttum, mjög hægum svæðum og svo hraðari. Þá eru tveir mjög hraðir beinir kaflar, sérstaklega sá sem er með rásmark og endamarkið. Það er einn hraðasti beini kaflinn á dagatalinu", sagði Glock.

„Veðrið getur verið mismunandi á þessum tíma árs, sem gerir mótið áhugaverðara. Markmið okkar er að ná meira út úr búnaði okkar og að fá nýja hluti til að virka betur", sagði Glock, en fékk endurbættan bíl í hendurnar í síðustu keppni, með ýmsum nýjungum.