Öryggismyndavélar vakta hústökuhúsið

"Ég er orðin nokkuð örugg. Mér líður allavegana betur með þetta," segir Sandra Hlíf Ocares, sem keypti niðurnítt hús á Bræðraborgarstígnum fyrir nokkru. Nú er búið að koma upptökuvélum í húsið.

Fólk og fyrirtæki hafa boðist til að hjálpa Söndru við að gera húsið upp eins og Álfaborg. Starfsmaður þaðan mætti óvænt og bauðst til að gefa Söndru flísar henni að kostnaðarlausu á baðið þar sem óprúttnir aðilar höfðu krotað rúnir í gólfið sem og á alla veggina.

Eins og alþjóð veit vinnur Sandra dag og nótt hörðum höndum að því að gera upp húsið sem var í niðurníðslu þegar hún keypti það.

Sandra er bjartsýn á framhaldið þrátt fyrir erfið bakslög en henni var verulega brugðið þegar eggjum var kastað í húsið fyrir nokkru og að ekki sé minnst á rúnirnar sem óprúttnir aðilar krotuðu á alla veggi hússins og í steypu eftir að þeir brutust inn í húsið í skjól nætur.

Húsið hafði staðið mannlaust í talsverðan tíma, fyrir utan þann tíma sem hústökufólk bjó í því.