Mörg hótel hálftóm

Talsmaður ferðaþjónustunnar segir mikið í húfi að flug komist af stað sem fyrst. Nærri gosstöðvunum standi margir gististaðir hálftómir, og þar hafi menn þungar áhyggjur af framhaldinu.

Erna Hauksdóttir, framkvæmdastjóri Samtaka ferðaþjónustunnar, segir ljóst að mikill uggur sé í ferðamannabransanum ef áfram verður lokað fyrir flugumferð á Keflavíkurflugvelli.

„Það hefur auðvitað mjög slæmar afleiðingar," segir Erna. „Það voru mikil vonbrigði að það hafi þurft að fella niður flugið í fyrramálið. Við eigum von á stórum hópum hingað til lands eftir helgi. Það er mikið í húfi að flugið komist af stað sem allra allra fyrst."

Þá segir Erna að ástandið í grennd við gosið sé slæmt. Hún hefur verið í sambandi við hóteleigendur á svæðinu í dag, og mörg hótelin séu hálftóm, þar sem fólki hafi verið hleypt vestur þegar rofaði til í dag.

„En fólki er náttúrulega ekki hleypt á svæðið. Þú getur ímyndað þér hvernig það er að reka hótel sem er galtómt. Það hafa allir áhyggjur af framhaldinu," segir Erna að lokum.