Leiðtogar G8 styðja Lagarde í stöðu forstjóra AGS

Allir leiðtogar G8 landanna styðja Christine Lagarde fjármálaraðherra Frakklands í stöðu forstjóra Alþjóðagjaldeyrissjóðsins (AGS).  Reuters hefur þetta eftir Alain Juppe utanríkisráðherra Frakka.

Í frétt Reuters segir að Frakkar hafi passað sig á því að nefna málið ekki opinberlega meðan á G8 fundi stóð í síðustu viku. Nú segir Juppe hinsvegar að allir leiðtogarnir átta, ásamt forseta framkvæmdaráðs ESB, standi á bakvið Lagarde.

Bandaríkjamenn hafa ekki viljað gefa upp opinberlega hvern þeir styðja í stöðu forstjóra AGS og er það í samræmi við fyrri stefnu þeirra þegar kemur að þessari stöðu.

Helsta hindrunin fyrir Lagarde að verða ráðin næsti forstjóri AGS er hugsanleg rannsókn á þætti hennar í sátt sem gerð var við Bernard Tapie árið 2008. Tapie var viðskiptamaður og einn af stuðningsmönnum Nicolas Sarkozy Frakkalandsforseta. Honum voru greiddar tæpar 300 milljónir evra vegna lagadeilu hans við banka í ríkiseigu.

Stjórnarandstaðan í Frakklandi hefur ásakað Lagarde um að hafa misnotað vald sitt þegar hún gekk frá sáttinni við Tapie.