Alonso ætlaði að sækja til sigurs

Fernando Alonso varð annar í Formúlu 1 mótinu í Mónakó í gær á Ferrari, eftir harðan slag við Sebastian Vettel á Red Bull og Jenson Button á McLaren á lokasprettinum. Hann hugðist sækja til sigurs, en óhapp í lok mótsins varð til þess að það gekk ekki upp. Alonso er núna fimmti í stigamóti ökumanna, en Vettel efstur eftir fimm sigra í sex mótum.

Jamie Alguersuari á Torro Rosso og Vitaly Petrov stöðvuðust í brautinni eftir árekstur og kalla þurfti út öryggisbílinn. Þetta þýddi að sókn Alonso á Vettel stöðvaðist á meðan hlé var gert á keppninni og Vettel gat skipt um dekk, sem voru orðinn slitinn. Hann hafði telft á tæpasta vað varðandi dekkjanotkun, en hafði samt náð að halda aftur af Alonso sem var á minna slitnum dekkjum. Alonso hugði gott til glóðarinnar hvað þetta varðar á lokasprettinum.

Alonso var engu að síður ánægður með árangur hans og Ferrari og sagði þetta á fréttamannafundi í gær.

„Við ræstum fjórðu af stað og þetta er besti árangurinn á árinu. Við vorum í þriðja sæti í Tyrklandi og í öðru hérna. Þetta var því góð helgi. Við vorum fljótir á fimmtudag og fljótir í tímatökunni og í keppninni", sagði Alonso.

Alonso sagði að lið hans hefði verið heppið þegar kalla þurfti út öryggisbílinn fyrr í keppninni vegna óhapps, því annars hefði Button kannski verið á leið til sigurs. Sjálfur hefði hann þá aðeins átt möguleika á þriðja sæti. Hann taldi því sig hafa grætt sæti á fyrra óhappinu, en síðan hefði hann hugsanlega tapað af mögulegum sigri, þegar öryggisbíllinn kom út í seinna skiptið.

Aðspurður um hvort hann hefði ætlað að sækja að Vettel á lokasprettinum sagði Alonso:

„Að sjálfsögðu. Ég hafði engu að tapa. Ég er ekki í forystu í stigamótinu og vildi því reyna að sigra. Ef við lendum í árekstri, þá lendum við í árekstri", sagði Alonso.

Alonso sagði líka að síðustu vikur hefðu verið Ferrari erfiðar og að liðið hefði þurft á hagstæðum úrslitum að halda og mótshelgin í Mónakó hefði verið hvatning fyrir liðið.