Þúsundir látinna Grikkja fá enn greiddan ellilífeyrir

Þúsundir af látnum Grikkjum halda enn áfram að fá ellilífeyri sinn greiddan og hafa gert það árum saman í mörgum tilfellum.

Grísk stjórnvöld eru nú í herferð gegn þessu svindli en talið er að þessar greiðslur kosti gríska ríkið marga milljarða króna á hverju ári.

Þá vill atvinnumálaráðherra Grikklands láta kanna hvort það fái staðist að yfir 9.000 Grikkir séu orðnir yfir 100 ára gamlir eins og opinberar tölur sýna. Þetta þykir óeðlilega hátt hlutfall og grunur leikur á að margt af þessu fólki sé löngu látið en að ættingjar þess hirði enn ellilífeyrinn sem þetta fólk fær borgaðan.

Í úrtaki sem gert var meðal opinberra embættismanna í Grikklandi kom í ljós að 4.500 þeirra fengu enn greiddan ellilífeyri þótt þeir væru látnir, og það sumir fyrir löngu síðan.