Segja enga ástæðu til að örvænta

Olíuframleiðsla Norðmanna dróst saman um 9,4 prósent í fyrra og hefur nú dregist saman í níu ár í röð. Þetta kemur fram í ársskýrslu olíurisans BP sem Dagens Næringsliv sagði frá í vikunni.

Staða Noregs sem olíuveldis hefur dalað mikið síðustu ár, sem sést einna best á því að árið 2001 var Noregur í sjötta sæti yfir mestu olíuframleiðendur heims en er nú í því þrettánda ásamt Brasilíu með um 2,1 milljónir tunna á dag. Á meðan framleiðsla Norðmanna dróst saman jókst framleiðsla á heimsvísu um 2,7 milljónir tunna á dag, eða 3,1 prósent.

Þessi þróun hefur vakið upp spurningar um framtíð olíuvinnslu í Noregi, en sérfræðingur BP sagði að með þessu áframhaldi yrðu núverandi olíulindir uppurnar innan níu ára.

Ola Anders Skauby, talsmaður Statoil, sagði í samtali við ríkisútvarpið NRK að þótt samdráttur væri staðreynd væri ekki ástæða til að örvænta, enda væru miklar vonir bundnar við olíuleit á nýjum svæðum sem og tækninýjungar í olíuvinnslu. „Við munum framleiða olíu í marga áratugi til viðbótar," segir Skauby.

- þj