Ítölsk lið fá aftur að kaupa tvo frá löndum utan Evrópusambandsins

Félög í Serie A mega kaupa tvo leikmenn á ári frá löndum utan Evrópusambandsins í stað eins. Takmörkunin við einn leikmann var sett eftir slaka frammistöðu Ítala á HM 2010 í Suður-Afríku.

Ítalska landsliðinu gekk illa á HM 2010 í Suður-Afríku og komst ekki upp úr riðli sínum. Ítalía vann raunar ekki leik og lenti í neðsta sæti riðilsins á eftir Paragvæ, Slóvakíu og Nýja-Sjálandi.

„Að félögin geti fengið til sín tvo leikmenn utan Evrópusambandsins er mikilvæg breyting fyrir ítalska knattspyrnu og gerir þau samkeppnishæfari," sagði Maruizio Beretta forseti Serie A.

Stóru félögin á Ítalíu sögðu að breytingin hefði haft slæm áhrif á gengi ítalskra liða og bentu á þá staðreynd að ekkert ítalskt lið komst í undanúrslit Meistaradeildar á síðasta tímabili.