Eigandi Kauphallarinnar í sigtinu í Svíþjóð

Samkeppniseftirlitið í Svíþjóð er nú með Nasdag OMX, eiganda kauphalla á Norðurlöndum og þar á meðal á Íslandi, til rannsóknar vegna meints brots á samkeppnislöggjöf landsins. Nasdag OMX er sakað um að hafa meinað samkeppnisaðila aðgangi að viðskiptakerfi í sinni eigu.

Fjallað er um málið í Financial Times. Þar segir að bandaríska símafélagið Verizon sé blandað inn í málið en það á að hafa aðstoðað Nasdag OMX við að halda yfirburðastöðu sinni á sænska hlutabréfamarkaðinum. Verizon mun hafa hindrað aðgang samkeppnisaðila Nasdag OMX að mikilvægu gagnaveri.

Málið hófst á síðasta ári þegar hlutabréfamiðlunin Burgundy lagði fram kvörtun yfir starfsháttum Nasdag OMX. Burgundy er í eigu norrænna banka og verðbréfamiðlara. Olof Neiglick forstjóri Burgundy segir að hann sé mjög ánægður með að sænska samkeppniseftirlitið hafi ákveðið að rannsaka málið.

Talsmaður Nasdag OMX viðurkennir að samkeppniseftirlitið hafi komið í heimsókn í sænsku kauphöllina og að forráðamenn hennar hafi aðstoðað eftirlitið eftir bestu getu og eigi fulla samvinnu við það. Heimsókn þessi átti sér stað fyrir mánuði síðan en komst fyrst í hámæli í þessari viku.

Nasdag OMX rekur kauphallir á Íslandi og í Svíþjóð, Finnlandi og Danmörku.