Ferrari stjórinn vill berjast án þess að skoða stigastöðuna

Stefano Domenicali, yfirmaður Ferrari segir að frammistaða liðs síns hafi verið ótrúleg í breska kappakstrinum í gær, en Fernando Alonso vann sinn fyrsta sigur í Formúlu 1 á árinu og Ferrari að sama skapi.

Ferrari mætti með endurbættan bíl sem virkaði vel á brautinni og Alonso færðist upp í þriðja sæti í stigakeppni ökumanna, en hann var fimmti fyrir mótið. Vettel er með 80 stiga forskot á Mark Webber, liðfélaga sinn hjá Red Bull og Alonso er 12 stigum á eftir Webber.

„Við sáum að frammistaða bíls okkar var góð við allar aðstæður, á öllum útgáfum dekkja, jafnvel á laugardag, þannig að ég er ánægður með það. En eins og áður, þá verðum við að ná árangri mót frá móti. Kannski verða hlutirnir öðruvísi í næsta móti", sagði Domenicali í frétt á autosport.com.

Alonso talaði um það á fréttamannafundi eftir keppnina að hann teldi að best væri að einbeita sér að hverju móti og reyna hámarka árangur liðsins í hverri keppni, en Sebastian Vettel er með gott forskot í stigamóti ökumanna og Red Bull í keppni bílasmiða.

„Við þurfum að horfa framávið og gæta þess að við höfum styrkleika fyrir næsta hluta tímabilsins og munum reyna að berjast án þess að skoða stigastöðuna. Hámarka árangurinn og sjá hvar við stöndum eftir sjö mót", sagði Domenicali.

Næsta mót er í Þýskalandi og Ferari mætir væntanlega með einhverjar endurbætur í þá keppni að sögn Domenicali. Felipe Massa, hinn ökumaður Ferrari náði fimmta sæti í keppninni á Silverstone í gær, eftir harðan slag við Lewis Hamilton á McLaren á lokasprettinum.

Staðan í stigamótinu

Ökumenn

 1.  Vettel       204        

 2.  Webber      124        

 3.  Alonso       112        

 4.  Hamilton     109        

 5.  Button       109        

 

Bílasmiðir

1. Red Bull    328

2. McLaren     218

3. Ferrari     164