Laxá í Dölum að vakna til lífsins

Eftir mikla tregðu er Laxá í Dölum vöknuð til lífsins. Að sögn Árna Friðleifssonar sem er á staðnum þá er kominn fiskur um alla á í kjölfar rigningar.

Sett var í sautján laxa í morgun og níu landað. Þar af voru fimm þeirra á svæði III sem hefur verið steindautt í sumar.

Þetta er svo sem ekki nýlunda þegar að Laxá í Dölum á í hlut, en áin er þekkt fyrir að vera sein til og óútreiknanleg. Er aflanum oft misskipt því í rigningatíð geta göngurnar í ána orðið ævintýralegar.

Einn leiðsögumanna keyrði til dæmis ofan í eina laxagönguna í morgun þegar að farið var yfir vað ofarlega í ánni. Splundraðist vaðið þegar að tugir laxa styggðust og ruku upp ána.

Birt með góðfúslegu leyfi SVFR