Hönnuður sigrar í stjörnustríði gegn George Lucas

Leikmyndahönnuðurinn sem bjó til hjálmana á Stormsveitirnar í Star Wars myndunum hefur unnið höfundaréttarmál gegn George Lucas leikstjóra myndanna.

Hönnuðurinn sem hér um ræðir heitir Andrew Ainsworth og hann hefur eytt meir ein hálfum áratug og yfir 130 milljónum króna í að slást við George Lucas fyrir dómstólum beggja vegna Atlantshafsins. Í Bandaríkjunum fór málið alla leið í Hæstarétt sem dæmdi Lucas í vil. Í Bretlandi, þar sem Ainsworth býr, fór málið einnig fyrir Hæstarétt og þar vann hönnuðurinn málið.

Málið hófst með því að Ainsworth seldi þrjá gamla hjálma sem hann átti í fórum sínum og fékk stórfé fyrir. Í framhaldinu fór hann að smíða og selja eftirlíkingar af Stormsveitahjálmunum árið 2002. Sú sala leiddi til þess að Lucas lagði fram 20 milljón dollara kröfu á hann fyrir brot gegn höfundarétti sínum.

Ainsworth segist vera ánægður með niðurstöðu málsins en hann mun hafa fjármagnað málskostnað sinn með sölu á þessum vinsælu hjálmum.

George Lucas segir það hættulegt fyrir breskan kvikmyndaiðnað að þar gildi ekki sömu lög um höfundarétt og í Bandaríkjunum. Slíkt leiði til þess að bandarískir kvikmyndagerðarmenn hugsi sig tvisvar um áður en þeir leiti til Breta um vinnu við kvikmyndir.