Hamilton vann háspennumót og sótti á Vettel í stigakeppni ökumanna

Sigur Lewis Hamilton í dag á Nurburgring brautinni í Þýskalandi í dag var McLaren liðinu mikilvægur og sýndi líka að Red Bull liðið ræður ekki lögum og lofum í meistaramótinu í Formúlu 1. Fernando Alonso á Ferrari vann síðustu keppni og forystumaður stigamótsins, Sebastian Vettel hjá Red Bull telur að liðið verði að taka sig á eftir daginn í dag.

Mótið á Nurburgring var spennandi frá upphafi til enda, en Hamilton stal strax í ræsingunni fyrsta sætinu af Mark Webber sem hafði verið fremstur á ráslínu. Hamilton, Webber og Alonso börðust síðan af krafti um fyrsta sætið og lengst af mátti vart milli sjá hver þeirra ætti mestu möguleikanna.

Þjónustuhléin í mótinu voru mikilvæg og kapparnir skipust á að leiða keppnina, en á lokasprettinum tókst Hamilton að auka forskot sitt á Webber og kom fyrstur í endamark. Bætti þannig stöðu sína í stigamóti ökumanna.

Webber varð annar og Alonso þriðji í mótinu í dag, en Vettel tryggði sér fjórða sætið eftir að hafa farið framúr Felipe Massa á Ferrari í þjónustuhléi í lok mótsins.

Vettel átti aldrei möguleika á sigri í mótinu, en hann er samt langefstur í stigamótinu sem fyrr og er með 216 stig, en Webber er næstur með 139, þá Hamilton með 134 og Alonso 130. Í keppni bílasmiða er Red Bull með 355 stig, McLaren 243 og Ferrari 192.

Lokastaðan í dag

 1.  Hamilton      McLaren-Mercedes           1:37:30.334

 2.  Alonso        Ferrari                    +     3.980

 3.  Webber        Red Bull-Renault           +     9.788

 4.  Vettel        Red Bull-Renault           +    47.921

 5.  Massa         Ferrari                    +    52.252

 6.  Sutil         Force India-Mercedes       +  1:26.208

 7.  Rosberg       Mercedes                   +     1 hringur

 8.  Schumacher    Mercedes                   +     1 hringur

 9.  Kobayashi     Sauber-Ferrari             +     1 hringur

10.  Petrov        Renault                    +     1 hringur