Aquilani búinn að skrifa undir samning við AC Milan til 2014

Alberto Aquilani er búinn að skrifa undir þriggja ára samning við ítalska liðið AC Milan þótt að hann komi þangað aðeins á láni frá Liverpool út þessa leiktíð. AC Milan fær hinsvegar forkaupsrétt á Alberto Aquilani spili hann 25 leiki eða fleiri með liðinu á tímabilinu og það má búast við því að hans framtíð verði því í Mílanóborg.

Aquilani er 27 ára miðjumaður sem kom til Liverpool frá Roma árið 2009. Hann var óheppinn með meiðsli á fyrsta tímabilinu sínu á Anfield og Liverpool lánaði hans síðan í fyrra til ítalska liðsins Juventus þar sem Aquilani stóð sig vel.

Aquilani mun fá það verkefni að leysa af Andrea Pirlo á miðju AC Milan í vetur en Pirlo samdi við Juventus fyrir þetta tímabil. Aquilani vildi komast aftur í ítalska boltann en hann er að berjast um sæti í landsliðshóp Ítala fyrir Evrópukeppnina næsta sumar.

Aquilani lék alls 18 leiki með Liverpool í ensku úrvalsdeildinni þar af kom hann inn á sem varamaður í 9 þeirra. Aquilani var með eitt mark og sex stoðsendingar á þeim 824 mínútum sem hann spilaði í ensku úrvalsdeildinni.