Funda um efnahagsvandann í París

Fjármálaráðherrar á evrusvæðinu munu funda í París um helgina til að ræða lausn á fjármálakrísunni á svæðinu.

Rætt er um að Alþjóðagjaldeyrissjóðurinn muni auka hlutdeild sína í aðgerðum til að bjarga Evrópuríkjum í fjárhagsvanda, en fram kemur á vef breska ríkisútvarpsins BBC að Bandaríkjamenn hafi sett sig upp á móti þeirri hugmynd.

Barack Obama, Bandaríkjaforseti og Angela Merkel, kanslari Þýskalands, áttu símafund í gær, meðal annars til að ræða fyrirhugaðar aðgerðir, en Obama er sagður hafa miklar áhyggjur af áhrifum fjárhagsvanda Evrópuríkja á bandarískan efnahag.

Viðræðurnar um helgina eru sagðar snúast að mestu um vanda Grikklands, en margir óttast að vandi Grikkja breiðist út til annarra skuldsettra Evrópuríkja eins og Spánar og Ítalíu.