Fjórir ökumenn eiga möguleika á öðru sætinu í stigamóti ökumanna

Fjórir ökumenn eiga möguleika á að ná öðru sæti i stigamóti Formúlu 1 ökumanna, þegar tveimur mótum er ólokið, en McLaren liðið tryggði sér annað sætið í stigamóti bílasmiða í gær, á eftir Red Bull, með árangri liðsins á Buddh brautinni í Indlandi.

Jenson Button á McLaren varð í öðru sæti í indverska kappakstrinum á eftir Sebastian Vettel á Red Bull og Lewis Hamilton á Mclaren varð sjöundi, en árangur Button og Hamilton þýddi að McLaren fékk nægilega mörg stig til að tryggja liðinu annað sætið í stigamóti bílasmiða.

Button er í öðru sæti í stigamóti ökumanna á eftir Vettel, sem er þegar orðinn heimsmeistari eins og Red Bull liðið er orðið meistari bílsmiða.

Button er efstur þeirra sem geta enn náð öðru sætinu, hann er með 240 stig, Fernando Alonso er með 227, Mark Webber og Lewis Hamilton 202. Button stendur því best að vígi fyrir lokamótin tvö, en keppt verður í Abu Dhabi 13. nóvember og Brasilíu 27. nóvember.

Button veitti Vettel mesta keppni á Buddh brautinni í Indlandi í gær, en réð ekki við hraða meistarans.

„Ég held að við höfum skilað hámarksárangri. Ég hafði yndi af upplifun helgarinnar. Það verða allir ökumenn spenntir að koma aftur hingað, af því þetta er undraverð braut, hröð og flæðandi," sagði Button í fréttatilkynningu frá McLaren.

„Indverska fólkið tók okkur opnum örmum og ég hef aldrei séð svona mikið af brosandi fólki. Áhorfendur voru dásamlegir. Ég vona að Formúla 1 vaxi í Indlandi í framtíðinni og við fáum enn fleiri áhorfendur á næsta ári."