Karthikeyan naut sín á heimavelli

Indverjinn Narain Karthikeyan ók á heimavelli í fyrsta indverska Formúlu 1 kappakstrinum á Buddh brautinni í Indlandi í gær. Hann ók bíl HRT liðsins í stað Tonio Liuzzi, sem er keppir venjulega með liðinu ásamt Daniel Ricciardo.

Karthikeyan var keppnisökumaður HRT í upphafi ársins, en var látinn víkja sæti fyrir Ricciardo eftir fyrstu átta mótin.

Karthikeyan fékk svo tækifæri á ný um helgina fyrir framan landa sína, en hann lauk keppni í sautjánda sæti. Liuzzi keppir á ný í síðustu tveimur mótum ársins með HRT liðinu ásamt Ricciardo.

„Ég átti gott kappakstursmót og naut mín virkilega vel, þetta var mögnuð upplifun," sagði Karthikeyan í frétt á autosport.com.

„Að ná sautjánda sæti á heimavelli er það besta sem ég hefði getað óskað mér, miðað við bílinn sem við höfum og að vera á undan liðsfélaga mínum og einum Lotus (bíl) í leiðinni gerir þetta enn ánægjulegra," sagði Karthikeyan.

„Það er stórkostleg tilfinning að hafa lokið fyrsta indverska kappakstrinum og að hafa verið samkeppnisfær við helstu keppinauta okkar."