Button: Yas Marina brautin tilkomumikil

Jenson Button hjá McLaren varð í öðru sæti á eftir Sebastian Vettel á Red Bull í síðustu Formúlu 1 keppni, sem var í Indlandi á nýrri braut og Button keppir í Abú Dabí um næstu helgi. Button er í öðru sæti í stigakeppni ökumanna, en Vettel er þegar orðinn heimsmeistari ökumanna.

Button varð heimsmeistari ökumanna árið 2009 og á góðar minningar frá fyrsta mótinu sem fór fram á Yas Marina brautinni í Abú Dabí.

„Abú Dabí mótið er mér minnisstætt, af því þetta var fyrsta mótið mitt eftir að ég varð heimsmeistari árið 2009. Kappaksturinn var því skemmtilegur og reynsla sem ég naut. Ég man að ég barðist af kappi við Mark (Webber) og varð þriðji," sagði Button.

Mótið í Abú Dabí hefst í dagsbirtu, en stendur framyfir rökkur og lýkur á flóðlýstri braut.

„Yas Marina brautin er tilkomumikil og framúrstefnuleg. Óvenjulegur staður. Það er ótrúlegt hvernig brautin breytist frá rökkri til myrkurs og hlýtur að vera mögnuð upplifun fyrir áhorfendur. Áhorfendastúkurnar eru byggðar þannig að allir hafa gott útsýni yfir það sem er í gangi á brautinni."

Button segir erfitt hafi verið að fara framúr á Yas Marina brautinni í fyrra, en fjórir beinir kaflar eru á brautinni. Hann telur að lengsti beini kaflinn ætti að bjóða upp á tilþrif hvað framúrakstur varðar og vonar að nýjar reglur og notkun á stillanlegum aftuvæng auki möguleika á framúrakstri á brautinni.

„Bíll okkar ætti að henta á brautina, þannig að ég er bjartsýnn. Við sáum í síðustu keppni að þó við hefðum ekki hraðann til að ná og komast framúr Sebastian (Vettel), þá þurfti hann að hafa fyrir sigrinum."

„Taktískt séð var frammistaða okkar fyrsta flokks. Ég fékk réttu skilaboðin frá liðinu á þjónustusvæðinu og þjónustuliðið vann sitt verk vel í þjónustuhléum. Það er ekki verið að keppa um meistaratitla lengur, en markmið okkar er að vinna mót," sagði Button.