Grikkir borguðu látnu fólki 1.300 milljarða í lífeyri

Stærsti lífeyrissjóður Grikklands hefur viðurkennt að hafa á síðustu 10 árum greitt tugþúsundum af látnu fólki lífeyrir sem nemur allt að 8 milljörðum evra eða nær 1.300 milljörðum króna.

Í gegnum árin hefur fjöldi Grikkja látið það vera að tilkynna um andlát ættingja sinna til að fá áfram lífeyri þeirra. Þetta hefur verið hægt sökum þess hversu gjörspillt embættismannakerfi landsins er.

Í frétt um málið í Berlinske Tidende kemur fram að athygli vekji að yfir 9.000 Grikkir eru sagðir yfir 100 ára gamlir og fá lífeyri. Íbúatalning í landinu árið 2001 leiddi hinsvegar í ljós að innan við 1.500 Grikkir voru á þessum aldri.