Mancini: Þetta er enginn heimsendir

Leikmenn Man. City gerðu það sem þeir gátu í kvöld. Lögðu Bayern en það dugði ekki til þar sem Napoli vann á sama tíma og komst þar með áfram en City verður í Evrópudeildinni ásamt nágrönnum sínum í United.

"Tíu stig duga venjulega til þess að fara áfram í þessari keppni. Við gerðum samt ákveðin mistök og leikurinn gegn Napoli var leikurinn sem felldi okkur," sagði Roberto Mancini, stjóri City, eftir leikinn í kvöld.

"Lífið er ekki á enda og þetta er enginn heimsendir. Við munum gera það sem við getum til þess að vinna Evrópudeildina. Við komum samt aftur í Meistaradeildina að ári og þá ætlum við að gera betur.

"Auðvitað vildum við allir vinna Meistaradeildina en Evrópudeildin er líka mikilvægur bikar sem ég hef ekki unnið áður."