Man. Utd gæti óvænt komið aftur inn í Meistaradeildina

Svo gæti farið að Manchester United verði í sextán liða úrslitum Meistaradeildar Evrópu eftir allt saman. Alþjóðaknattspyrnusambandið, FIFA, hefur nefnilega hótað knattspyrnusambandi Sviss og fari sambandið ekki eftir þeirra fyrirmælum þá verður öllum svissneskum liðum meinað að taka þátt í Evrópukeppnum.

Það myndi þýða að Basel, sem sló Man. Utd, út úr Meistaradeildinni, gæti ekki tekið þátt í sextán liða úrslitum Meistaradeildarinnar. Sætið gæti því færst yfir á Man. Utd en einnig kemur til greina að Bayern Munchen fari beint í átta liða úrslitin.

Svissneska knattspyrnusambandið hefur til 13. janúar að verða við fyrirmælum FIFA. Ef ekki þá er Basel búið að vera og United gæti óvænt komið aftur inn í Meistaradeildina.

Málið snýst um svissneska liðið Sion sem keypti sex leikmenn í sumar þó svo félagið hafi verið í banni á leikmannamarkaðnum. Leikmennirnir fóru með málið fyrir dómstóla í Sviss sem sagði að þeir mættu spila.

Fyrir vikið spiluðu þeir með Sion í svissnesku deildinni. Sion spilaði svo þessum leikmönnum í Evrópudeildinni gegn Celtic. Sion hafði betur en UEFA greip í taumana og gaf Celtic sigurinn þar sem Sion hafði notað ólöglega leikmenn samkvæmt þeirra túlkun.

Málið fór í kjölfarið fyrir dómstóla á ný. Íþróttadómstóllinn dæmdi UEFA í hag og hæstiréttur í Sviss snéri upprunalega dómnum í Sviss. Leikmennirnir eru því að öllu leyti ólöglegir.

FIFA fer fram á að Sion verði dregið úr leik í svissneska boltanum. Ef svissneska sambandið fer ekki að þessum fyrirmælum fyrir 13. janúar verða refsingar sem gætu hleypt ensku meisturunum óvænt í Meistaradeildina á nýjan leik.