Jean Todt, forseti FIA, átti fund með forseta Íslands

Forseti aljþjóðabílasambandsins, FIA, Frakkinn Jean Todt kom til Íslands í dag, en hann er yfir bílasambandi sem stýrir umferðarmálum á heimsvísu og ýmsum akstursíþróttargreinum, eins og t.d. Formúlu 1. Todt var á árum áður heimsþekktur fyrir að stýra liði Ferrari í Formúlu 1 og vann marga titla með Michael Schumacher og Ferrari liðinu. Todt tók síðan við embærtti forseta FIA haustið 2009.

Todt heimsótti 55 lönd í fyrra til að kynnast af eigin raun hvernig umferðaröryggismál eru í ýmsum löndum og stefnir á að heimsækja 45 lönd á þessu ári. Todt kom frá Noregi í dag, en heldur af landi brott í kvöld til Írlands.

"Hann kom til að kynnast hér umferðaröryggi, mengunarmálum og þróun bílsns. Við höfum verið að prófa dekk hérlendis og þróa nýja orkugjafa. Einnig verið með prófanir á bílum og tækjum. Þá voru honum sýnd myndbönd af íslenskri torfæru og rallakstri", sagði Ólafur Guðmundsson, sem starfar að umferðaröryggismálum hérlendis.

Ólafur sagði að Todt hefði heimsótt forseta Íslands, Ólaf Ragnar Grímsson og þeir hefðu lært hvor af öðrum um nýja orkugjafa, land og þjóð í víðum skilningi, sem og umferðarmenninguna. Þá hefðu þeir rætt möguleika Íslands í alþjóðlegu samhengi.

Todt heimsótti einnig Ögmund Jónasson innanríkisráðherra og forystu Íþrótta og Ólympíusambands Íslands. Hann átti einnig fund með FÍB og LÍA, sem eru aðildarfélög innan FIA.