Járnblendiverksmiðjan í kínverska eigu

Viðskipti með hlutabréf í norska iðnaðarrisanum Orkla voru stöðvuð um tíma í kauphöllinni í Osló í morgun. Þetta gerðist eftir að Orkla staðfesti samningaviðræður við kínverska félagið China National Bluestar um kaup þess á Elkem, þar á meðal járnblendiverksmiðju þess á Grundartanga.

Í frétt um málið á vefsíðunni e24.no segir að staðfestingin komi ekki á óvart enda var fyrst greint frá áhuga Kínverjanna á að kaupa Elkem snemma í vetur. Málið tafðist hinsvegar vegna uppistandsins í tengslum við friðarverðlaun Nóbels. Eins og kunnugt er fór mjög fyrir brjóstið á Kínverjum að andófsmaðurinn Liu Xiaobo skyldi hljóta verðlaunin í fyrra.

Per Haagensen greinandi hjá Fonsfinans segir að líklega verði gengið frá sölunni á fyrrihluta þessa árs. Reiknað er með að Orkla geti fengið 12 til 15 milljarða norska kr. fyrir Elkem eða 240 til 300 milljarða kr.

Viðskipti eru aftur hafin með hlutabréf í Orkla og hafa þau hækkað um 2,4% í morgun.