Samuel Eto’o skoraði tvö í bikarsigri Inter á Genoa

Kamerúnmaðurinn Samuel Eto'o skoraði tvö mörk í ítalska bikarnum í kvöld þegar Inter vann 3-2 sigur á Genoa í 16 liða úrslitum keppninnar. Eto'o er búinn að skora 21 mark í öllum keppnum á tímabilinu.

Eto'o skoraði tvö fyrstu mörk leiksins í fyrri hálfleiknum, Houssine Kharja minnkaði muninn úr vítaspyrnu en McDonald Mariga skoraði þriðja mark Inter skömmu síðar. Giuseppe Sculli minnkaði muninn í eitt mark í uppbótatíma.

Fabio Miccoli tryggði Palermo 1-0 sigur á Chievo í hinum bikarleik kvöldsins en sigurmarkið kom úr vítaspyrnu á 80. mínútu sem Miccoli fiskaði sjálfur.