Bill Gates ekki lengur ríkasti maður heimsins

Bill Gates stofnandi Microsoft er ekki lengur ríkasti maður heimsins samkvæmt árlegum lista Forbes tímaritsins.

Þá stöðu hefur Mexíkaninn Carlos Slim Helu tekið af honum en sá hefur einkum auðgast á rekstri símafyrirtækja.

Þetta er í þriðja sinn á þremur árum að toppsætið á listanum yfir ríkustu menn heimsins skiptir um eigendur.

Auðæfi Slim hafa vaxið um 18,5 milljarða dollara og í 53,5 milljarða dollara, eða um 6.000 milljarða kr. á liðnu ári. Bill Gates er í öðru sæti listans með auðæfi sem metin eru á 53 milljarða dollara. Ofurfjárfestirinn Warren Buffett er í þriðja sæti listans.