Málum í vinnslu fjölgaði í fyrra

Um 500 mál eru í vinnslu hjá ESA, eftirlitsstofnun EFTA. Í ársskýrslu stofnunarinnar kemur fram að álag á hana hafi fremur aukist á síðasta ári. Þá voru tekin upp 370 ný mál, en 362 lokið.

Fram kemur í tilkynningu ESA um ársreikninginn, að stóran hluta þeirra mála sem fengist er við megi rekja til fjármálakreppunnar. Sér í lagi eigi það við um Ísland, þar sem komið hafi upp mál sem tengist bæði ríkisaðstoð og reglum innri markaðar evrópska efnahagssvæðisins.

„Við vonumst til þess að koma frá eins mörgum af þessum málum og kostur er á árinu 2011 þannig að allir hlutaðeigandi geti fremur horft til framtíðar í áherslum sínum,“ segir Per Sanderud, forseti ESA, í inngangi ársreiknings stofnunarinnar.

Meðal annarra mikilvægra ákvarðana ESA segir Sanderud vera þá afstöðu að kröfuhafar föllnu íslensku bankanna eigi tilkall til eigna þeirra. Þá segir hann stórt skref hafa verið stigið í að framfylgja Evrópureglum um samkeppni þegar Posten AS í Noregi var sektað um 12,89 milljónir evra í júlí í fyrra. Þá hafi verið tekið á mikilsverðum málum tengdum skattlagningu í Liechtenstein, auk þess sem ríkisstjórn þar hafi verið fundin sek um ólöglega ríkisaðstoð sem þurfi að endurgreiða ríkinu. Málum Liechtenstein og Posten í Noregi hefur verið skotið til EFTA-dómstólsins. Dómstóllinn tók við 18 málum á árinu, sem er sagt met í sögu dómstólsins.- óká