Grikkir ekki staðið við skuldbindingar

Þróunarsjóður Fríverslunarsamtaka Evrópu (EFTA) hefur fryst frekari fjárframlög til Grikklands þar sem stjórnvöld þar hafa ekki staðið við sín fyrirheit í tengslum við framlögin.

Sjóðurinn fjármagnar ýmis verkefni sem hafa það að markmiði að auka jafnræði í ríkjum í Mið- og Suður-Evrópu. Um 248 milljónir evra áttu að renna til Grikklands vegna áranna 2004 til 2009. Um 13 milljónir hafa þegar verið greiddar, en þær 235 milljónir sem upp á vantar hafa nú verið frystar. Á vef norska utanríkisráðuneytisins kemur fram að grísk stjórnvöld hafi ekki staðið við sínar skuldbindingar vegna framlaganna. Féð hafi farið seint eða ekki til þeirra verkefna sem það hafi verið eyrnamerkt. Þá hafi verið misbrestur á mótframlögum frá grískum stjórnvöldum til verkefnanna.

Greiðslurnar verða frystar þar til grísk stjórnvöld sýna fram á að allt fé hafi runnið til réttra verkefna, og að mótframlag hafi borist.

Urður Gunnarsdóttir, upplýsingafulltrúi utanríkisráðuneytisins, segir ákvörðun um frystingu framlaga tekna á vettvangi þróunarsjóðsins, þar sem Ísland á fulltrúa. - bj