Snúa sér til Evrópu

Talið er að kínversk stjórnvöld hafi dregið úr kaupum á bandarískum ríkisskuldabréfum á fyrstu fjórum mánuðum ársins og séð hag sínum borgið með kaupum á evrópskum ríkisskuldabréfum.

Breska viðskiptablaðið Financial Times segir þetta í samræmi við yfirlýsingar kínverskra ráðamanna þess efnis að stjórnvöld ætli að styðja fjárhagslega við þau Evrópuríki sem glími við fjárhagserfiðleika.

Kínverski seðlabankinn hefur keypt bandarísk ríkisskuldabréf viðstöðulítið síðastliðin sex ár og var í mars síðastliðnum stærsti lánardrottinn Bandaríkjanna með þrjú þúsund milljarða dala af skuldabréfum í hirslum sínum.

Það var breski bankinn Standard Chartered sem vann mat á fjárfestingum kínverskra stjórnvalda upp á síðkastið. Gögn bankans benda til að gjaldeyrisforði Kínverja hafi aukist um tvö hundruð milljarða Bandaríkjadala á fyrstu fjórum mánuðum ársins.

Stephen Green, aðalhagfræðingur Standard Chartered í málefnum Kína, segir í samtali við Financial Times ævinlega erfitt að átta sig á fjárfestingum kínverska seðlabankans. Hann fjárfesti í gegnum fjármálastofnanir utan landsteina, svo sem í London og Hong Kong í þeim tilgangi að fela slóð fjárfestinga sinna. - jab