Símenntun er hvati til framfara

Hlutverk Opna háskólans í HR er að auka samkeppnishæfni og lífsgæði með því að bjóða fagtengda símenntun, stjórnendaþjálfun og aðrar hagnýtar námsleiðir til lífstíðarlærdóms utan hefðbundinna námsbrauta HR í samstarfi við akademískar deildir HR og atvinnulífið," segir Guðrún Högnadóttir framkvæmdastjóri.

„Hingað koma nemendur í nám en ganga út með nýja sýn og raunhæfar hugmyndir auk færni, kjarks og getu til að takast á við fjölbreyttar áskoranir og tækifæri í okkar samfélagi. Tæplega níu þúsund þátttakendur sóttu viðburði á okkar vegum í fyrra og þátttaka erlendra nemenda fer stöðugt vaxandi – með innflutningi nemenda og útflutningi kennara." Guðrún leggur áherslu á stöðuga þörf lífstíðarlærdóms. „Símenntun er hvati framfara – þannig gerum við þekkingu enn aðgengilegri, sem eykur skilning, sátt og sóknarfæri í okkar samfélagi. Fjöldi nýrra námsleiða er í boði við Opna háskólann í haust og skráning hefur farið firna vel af stað."

Salóme Guðmundsdóttir verkefnastjóri segir að til viðbótar við fjölbreytt úrval námskeiða á haustönn hafi verið bætt við nýjum námsleiðum. „Þar má meðal annars nefna Mannauðsstjórnun – HRE (Human Resource Expert) og Viðskipti um vefinn sem hefur verið unnið í nánu samstarfi við sérfræðinga innan viðkomandi greina til að mæta vaxandi eftirspurn eftir námskeiðum á þessum sviðum."

Hún segir að Opni háskólinn bjóði einnig upp á sérsniðnar lausnir og aðlagi námskeið að þörfum fyrirtækja og atvinnugreina. „Auk þess er í boði fjöldi opinna námskeiða fyrir stjórnendur í íslensku atvinnulífi. Við munum einnig í annað sinn bjóða upp á PMD-stjórnendanám HR sem er sérlega hentugt fyrir stjórnendur sem vilja efla hæfni sína með öflugri námslínu, án þess að skuldbinda sig til margra ára náms."