Þarf að kaupa sér sjónvarp

Vera Sölvadóttir kvikmyndagerðarkona er einn stjórnenda menningarþáttarins Djöflaeyjunnar sem hefur göngu sína á RÚV á þriðjudag. Þetta er frumraun Veru á sjónvarpsskjánum og er hún mjög spennt fyrir fyrsta þættinum.

Djöflaeyjan fjallar um leiksýningar, kvikmyndir, heimildarmyndir og sjónvarpsþætti auk þess sem skyggnst verður á bak við tjöldin og viðtöl tekin við fagfólk. „Í fyrsta þættinum heimsækjum við til dæmis þýskan hljóðmann sem gerir hljóðbrellur fyrir sjónvarp og bíó. Hann gerði meðal annars fuglahljóð með viskustykki og hófatak með kókoshnetum og það var alveg ótrúlega fyndið og skemmtilegt að fylgjast með honum,“ útskýrir Vera.

Hún segist hafa fengið símtal frá Þórhalli Gunnarssyni sjónvarpsmanni í vor þar sem hann bauð henni að starfa við gerð Djöflaeyjunnar.

„Mér fannst þetta mjög spennandi og sagði strax já. Þetta er í fyrsta sinn sem ég birtist á sjónvarpsskjánum en ég er lítið kvíðin því efnið er gott og fólkið sem ég vinn með mjög hæfileikaríkt. Við erum þegar búin að taka upp efni fyrir fyrsta og annan þátt en munum svo vinna að næstu þáttum alveg fram á vor þegar göngu þeirra lýkur.“

Innt eftir því hvort hún ætli að halda frumsýningarveislu fyrir vini og vandamenn á þriðjudagskvöld segist Vera ekki hafa skipulagt slíkt ennþá. „Ég þarf að kaupa mér sjónvarp fyrst, ég er sjónvarpslaus eins og er. En hver veit, kannski slær maður upp veislu,“ segir hún glaðlega að lokum.- sm