Semja ný lög í sumarbústað

Mammút hefur verið að semja lög á næstu plötu sína í sumarbústað uppi í sveit. „Við leigðum ódýran sumarbústað fyrir utan bæinn, pínkulítinn. Við erum búin að fara þangað tvisvar í sumar og höfum verið í viku, tíu daga í senn,“ segir söngkonan Katrín Mogensen. „Það hefur gengið mjög vel. Það var algjörlega frábær ákvörðun.“ Upptökur á nýju plötunni hefjast í næsta mánuði.

Hljómsveitin var búin að taka upp marga grunna fyrir plötuna en ákvað að henda þeim í ruslið og byrja upp á nýtt. „Við þurftum að gera eitthvað róttækt á eftir Karkara [sem kom út 2008]. Við þurftum að kúpla okkur út frá þeirri plötu,“ segir Katrín. „Við vorum búin að spila hana svo mikið en núna á Airwaves ætlum við bara að spila nýtt efni. Við ætlum að setja Karkara á hilluna í bili.“

Mammút, sem sigraði í Músíktilraunum 2004, spilaði á Nasa í gær á Airwaves-hátíðinni. Í dag verður hún í kaffiaðstöðunni hjá nemendagalleríi Listaháskólans og á Kex Hostel. Á morgun spilar sveitin svo utan dagskrár í kjallaranum hjá Ásu Dýradóttur, bassaleikara Mammúts, á Laufásvegi 14. Þar stígur einnig á svið hljómsveitin Muck.- fb