Grípandi danspopp Rihönnu

Söngkonan hæfileikaríka Rihanna er mætt með sína sjöttu hljóðversplötu. R&B og danspoppið er sem fyrr afar fyrirferðarmikið.

Sjötta hljóðversplata hinnar vinsælu Rihönnu, Talk That Talk, er nýkomin út. R&B-tónlist og danspopp eru áberandi á plötunni, þó svo að stefnur á borð við elektró, house og dubstep komi einnig við sögu. Fyrsta smáskífulagið, We Found Love, er til að mynda kjörið til að setja á fóninn á sjóðheitum dansgólfum skemmtistaða rétt eins og raunin varð með Only Girl (In the World) af plötunni Loud sem kom út fyrir áriRihanna, eða Robyn Rihanna Fenty eins og hún heitir fullu nafni, fæddist á Barbados fyrir 23 árum.

Mamma hennar var endurskoðandi og pabbi hennar starfsmaður í vöruhúsi en einnig forfallinn eiturlyfjaneytandi. Þau skildu þegar Rihanna var 14 ára.

Ferill hennar hófst eftir að tónlistarframleiðandinn Evan Rogers var í fríi á Barbados með þarlendri eiginkonu sinni. Þar var honum bent á heimastúlkuna Rihönnu sem þótti afar efnileg. Rogers hefur unnið með N*SYNC, Christinu Aguilera og Kelly Clarkson og hann hjálpaði þessari ungu söngkonu við að gera prufuupptöku og sendi á helstu plötufyrirtækin. Rihanna var kölluð inn í áheyrnarprufu hjá Def Jam Recordings þar sem rapparinn og þáverandi yfirmaður fyrirtækisins, Jay-Z, bauð henni samning á staðnum.

Fyrsta plata Rihönnu, Music of the Sun, kom út sumarið 2005 og komst lagið Pon de Replay ofarlega á vinsældarlista. Næsta plata, A Girl Like Me, kom út aðeins átta mánuðum síðar og nutu bæði S.O.S. og Unfaithful mikilla vinsælda. Rihanna breytti um áherslur á þriðju plötunni A Girl Gone Bad. Upptökustjórarnir Timbaland, will.i.am og Sean Garrett föndruðu fyrir hana ferska danstakta á sama tíma og útlit hennar varð djarfara og myrkara og þannig hefur það haldist allar götur síðan. Lagið Umbrella sló í gegn um heim allan og Rihanna var orðin að megastjörnu. Næsta plata, Rated R., kom út skömmu eftir að Rihanna hætti með popparanum Chris Brown. Hann hafði lamið hana rétt áður en hún átti að koma fram á Grammy-hátíðinni og fjölmiðlar gerðu sér mikinn mat úr dramatíkinni í kringum atvikið.

Síðan þá hefur Rihanna sýnt mikinn styrk. Auk þess að gefa út eigin plötur hefur hún verið dugleg að syngja með öðrum tónlistarmönnum, þar á meðal Kanye West, Coldplay og Nicki Minjai. Annars hefur Talk That Talk fengið miðlungsgóðar viðtökur. Rolling Stone gefur henni þrjár og hálfa stjörnu og The Guardian fjórar en NME gefur henni fimm af tíu mögulegum og Pitchfork sex af tíu.

freyr@frettabladid.is