Dóra María hafnaði Rayo Vallecano

Landsliðskonan Dóra María Lárusdóttir, sem var valinn besti leikmaður Pepsi-deildar kvenna, síðasta sumar mun ekki ganga í raðir spænska liðsins Rayo Vallecano.

Dóra María hafnaði tilboði spænska liðsins en þetta staðfesti umboðsmaður hennar við Stöð 2.

Annað spænskt lið var einnig á eftir Dóru Maríu en hún náði ekki heldur samkomulagi við það lið.

Dóra hefur verið ein besta knattspyrnukona landsins og eftirsótt af mörgum liðum. Hún hefur þrátt fyrir það ekki enn ákveðið að reyna fyrir sér erlendis.

Ekki er þó útilokað að hún fari út því hún er einnig með tilboð í höndunum frá liði í Skandinavíu.