Niðurskurður ríkisfjármála getur kæft vaxtamöguleika hagkerfa

Framkvæmdastjóri Alþjóðagjaldeyrissjóðsins varar við að óviðeigandi niðurskurður ríkisfjármála geti kæft vaxtamöguleika hagkerfa. Aðlaga þurfi niðurskurðaráætlanir við hvert hagkerfi fyrir sig.

Christine Lagarde framkvæmdastjóri Alþjóðagjaldeyrissjóðsins varar við að of mikill niðurskurður í ríkisfjármálum geti orðið til þess að hagkerfi skuldsettra landa hætti að vaxa. Þetta er meðal umræðuefna á ráðstefnu Alþjóðaefnahagsráðsins í Davos í Sviss.

Hún segir að skuldsettar þjóðir þurfi vissulega að skera niður en ekki megi fara eins að því í öllum löndum, finna þurfi réttu lausnina fyrir hvert og eitt ríki þannig að ekki sé gengið of nærri hagkerfunum. Hún segir að evrópulönd séu að vinna í sínum skuldavanda og árangur sé farinn að koma í ljós.

Á ráðstefnunni ræddi fjármálaráðherra Bandaríkjanna Timothy Geithner einnig um að aukinn meinlætalifnaður í ríkisfjármálum geti orðið til þess að auka á hnignun hagkerfisins og þar með skapað vítahring samdráttar og niðurskurðar.

Fyrir mörg Evrópulönd sé hins vegar enginn annar möguleiki fyrir hendi en að skera verulega niður í ríkisfjármálum til lengri tíma litið.