AC Milan ætlar að áfrýja banni Zlatans

Zlatan Ibrahimovic hefur verið dæmdur í þriggja leikja bann fyrir að slá til andstæðings um helgina. AC Milan, lið hans, hefur ákveðið að áfrýja úrskurðinum.

Ibrahimovic sló Salvatore Aronica, leikmann Napoli, í leik liðanna um helgina en honum lauk með markalausu jafntefli.

Ef bannið stendur missir hann af toppslag AC Milan og Juventus þann 25. febrúar næstkomandi en Milan er nú einu stigi á eftir Juve - sem á þó leik til góða.

Það hefur gengið á ýmsu hjá Zlatan í gegnum tíðina og er hann ekki þekktur fyrir að hafa góða stjórn á skapinu þegar mikið gengur á. Hann á þó glæsilegan feril að baki og hefur orðið deildarmeistari með fjórum liðum í þremur löndum.