Sigríður: Heill íslenska ríkisins var í hættu

Hættan sem vofði yfir Íslandi á árinu 2008 var fyrirfram sýnileg af manni í sporum forsætisráðherra, sagði Sigríður J. Friðjónsdóttir þegar hún hóf málflutning fyrir Landsdómi í dag. Hún krafðist þess að Geir yrði dæmdur til refsingar og til að greiða sakarkostnað vegna Landsdómsmálsins.

Sigríður sagði að saksóknari mæti málið þannig að Geir Haarde hafi haft vitund um hættuna sem vofði yfir en hann hafi ekki brugðist við. Sigríður sagði að bankarnir þrír hafi verið kerfislega mkilvægir. Hættan sem vofði yfir hafi valdið því að heill ríkisins hafi því verið í hættu.

Sigriður vísaði í orð Davíðs Oddssonar, þáverandi seðlabankastjóra, sem sagði að Halldór Ásgrímsson, þáverandi forsætisráðherra, hafi hringt í sig eina helgi um sumarið 2006 og sagt að staða bankanna væri þannig að bankastjórarnir hefðu óttast um að bankarnir gætu ekki opnað mánudaginn á eftir.

Málflutningur Sigríðar hófst á slaginu eitt í dag og er búist við því að hann taki þrjár klukkustundir. Andri Árnason, verjandi Geirs, mun svo flytja mál sitt á morgun.