Emil og félagar felldu Torino af toppnum

Emil Hallfreðsson og félagar í Hellas Verona unnu flottan 4-1 útisigur á toppliði Torino FC 1. í ítölsku b-deildinni í kvöld en Torino missti fyrir vikið toppsætið.

Emil lék allar 90 mínúturnar á miðjunni og átti þátt í einu marka Verona-liðsins. Verona er nú í þriðja sæti aðeins tveimur stigum á eftir Torino og fjórum stigum á eftir Pescara sem komst í toppsætið í kvöld.

Argentínumaðurinn Juan Ignacio Gomez Taleb skoraði tvö mörk fyrir Verona en hin mörkin skoruðu þeir Nicola Ferrari og Domenico Maietta.

Emil hefur skorað 6 mörk og gefið 6 stoðsendingar í 26 leikjum með Verona á þessu tímabili en hann hefur spilað 90 mínútur í 20 af þessum 26 leikjum.