Bayern München opnar knattspyrnuakademíu í Japan

Asískir leikmenn gera það gott í þýska boltanum þessa dagana og forráðamenn FC Bayern virðast hafa mikla trú á leikmönnum frá Japan því þeir ætla að opna knattspyrnuakademíu nærri Hiroshima.

Bayern hefur lengi verið eitt vinsælasta knattspyrnuliðið í Japan en áhuginn á liðinu hefur dalað í kjölfar þess að lánsmaðurinn frá Japan, Takashi Usami, fær lítið að spila hjá liðinu.

Á sama tíma eru þrír aðrir Japanir að blómstra með öðrum liðum í Þýskalandi.

Akademían mun taka við 320 leikmönnum á aldrinum þriggja ára til fimmtán. Forráðamenn Bayern vonast til þess að þetta útspil muni skila liðinu góðum leikmönnum sem og að Bayern verði aftur vinsælasta, þýska liðið í Japan.