Önnur umferð: Malasíski kappaksturinn 2012

Formúla 1 stoppar næst á Sepang-brautinni í Malasíu, 60 kílómetra frá höfuðborginni Kuala Lumpur. Á þessari sérbyggðu braut hefur verið keppt síðan hún var opnuð árið 1999.

Sepang brautin er fyrsta F1 brautin sem Hermann Tilke hannaði frá grunni. Sá fékk síðar að hanna sjö aðrar brautir sem keppt verður á í Formúlu 1 í ár. Brautir Tilke hafa reynst mjög vel því þær eru alla jafna mjög hraðar en geyma nokkrar mjög hægar beygjur. Það getur því oft verið snúið fyrir ökumenn að stilla bíla sína rétt fyrir kappakstur. Þannig er því líka farið í Malasíu.

Ökumenn hafa í vikunni talað um að þeir muni þurfa að taka ákvörðun um hvort þeir fórni dekkjunum eða hraða. Nico Rosberg, ökumaður Mercedes liðsins, sagðist þurfa að einblína á dekkin í keppninni. "Það verður örugglega ekki auðveldara að fara vel með dekkin hér," sagði Nico. "Það gæti þýtt að ég verði að fórna tímatökuhraða."

Vegna þess hversu hröð brautin er, með háhraðabeygjur í bland við langa beina og hraða kafla, skiptir loftflæðið um bílana gríðarlegu máli. Liðin munu reyna að stilla bílunum þannig upp að þeir hámarki veggripið án þess að fórna hraðanum.

Brautin er mjög tæknileg fyrir ökumenn að aka og krefst hámarks einbeitingar allstaðar. Beygja 1 og 14 eru taldar mikilvægastar.

Í beygju 1, sem heimamenn kalla Pangkor Laut, einbeita ökumenn sér að því að koma bílnum á réttan stað fyrir næstu beygju sem jafnframt er sú hægasta í mótinu. Pangkor Laut er löng og aflíðandi sem kreppist í lokin.

Aðkoman að beygju 14 er flókin. Ökumenn bremsa inn í beygjuna um leið og þeir eru hálfnaðir með beygjuna á undan, sem er aflíðandi og hröð. Mikilvægt er að koma rétt inn í beygjuna því á eftir beygju 14 er mjög langur beinn kafli sem mikilvægt er að nota til hins ítrasta.

DRS svæði: Á ráskaflanum fyrir beygju 1. Mælingin fer fram rétt fyrir beygju 15.

Dekkjagerðir í boði: Hörð (prime) og meðal (option)

Efstu þrír í fyrra:

1. Sebastian Vettel - Red Bull

2. Jenson Button - McLaren

3. Nick Heidfeld - Renault

Allt mótið er í beinni útsendingu á Stöð 2 Sport.

Föstudagur:

02:00 Æfing 1

06:00 Æfing 2

Laugardagur:

04:55 Æfing 3

07:50 Tímataka

11:45 Tímataka (endursýnt)

Sunnudagur:

07:45 Malasíski kappaksturinn

14:00 Kappaksturinn (endursýnt)

Staðan í titilbaráttunni eftir eina umferðÖkumenn

1. Jenson Button - 25 stig

2. Sebastian Vettel - 18

3. Lewis Hamilton - 15

4. Mark Webber - 12

5. Fernando Alonso - 10

6. Kamui Kobayashi - 8

7. Kimi Raikkönen - 6

8. Sergio Perez - 4

9. Daniel Ricciardo - 2

10. Paul di Resta - 1

Bílasmiðir

1. McLaren - 40 stig

2. Red Bull - 30

3. Sauber - 12

4. Ferrari - 10

5. Lotus - 6

6. Toro Rosso - 2

7. Force India - 1