Mourinho: Ég ætla ekki að horfa á leik Barcelona og AC Milan

Jose Mourinho, þjálfari Real Madrid, lýsti því yfir á blaðamannafundi í dag að hann ætlaði ekki að horfa á leik Barcelona og AC Milan í átta liða úrslitum Meistaradeildarinnar en liðin mætast á Camp Nou í kvöld. AC Milan og Barcelona gerðu markalaust jafntefli í fyrri leiknum og því mikil spenna fyrir leik kvöldsins.

„Ég ætla að horfa á leik Bayern og Marseille í kvöld því við munum mæta öðru þessara liða ef við komust áfram," sagði Jose Mourinho á blaðamannfundi fyrir seinni leik Real Madrid og APOEL.

„Leikur Barca og Milan verður frábær leikur og kannski sá mikilvægasti í átta liða úrslitunum en ég mun ekki horfa á hann því í dag skiptir hann engu máli fyrir okkur," sagði Mourinho.

Leikur Barcelona og AC Milan hefst klukkan 18.45 og verður í beinni á Stöð 2 Sport. Leikur Bayern München og Marseille verður í beinni á Stöð 2 Sport 3.

Real Madrid vann 3-0 útisigur á APOEL Níkosía í fyrri leiknum sínum og það þarf mikið að gerast til þess að þeir komist ekki áfram í undanúrslitin.