Galliani vill fá sprotadómara í ítalska boltann

Adriano Galliani, varaforseti AC Milan, er búinn að skrifa formanni ítalska knattspyrnusambandsins bréf þar sem hann kvartar yfir tveimur mikilvægum dómum sem hafa fallið gegn Mílanó-liðinu.

Galliani er afar svekktur yfir þessum mistökum og hefur farið fram á það við ítalska sambandið að það fjölgi dómurum á leiki í ítölsku úrvalsdeildinni.

Mark var dæmt af Milan í 1-1 jafnteflisleiknum gegn Juve en það átti alltaf að standa. Boltinn fór klárlega inn fyrir línuna. Svipað atvik átti sér stað í 1-1 jafnteflinu gegn Catania um helgina.

Galliani er búinn að birta bréfið á heimasíðu Milan og þar vill hann fá sprotadómara við hlið markanna þar sem FIFA er ekki enn búið að leyfa marklínutækni.

Galliani bíður svara frá sambandinu.