Metafgangur af vöruskiptum Noregs eða yfir 1.000 milljarðar

Í mars s.l. varð mesti afgangur af vöruskiptum í sögu Noregs. Útflutningurinn nam tæpum 89 milljörðum norskra króna en innflutningurinn var helmingi minni eða 42,5 milljarðar norskra króna. Mismunurinn, 46,4 milljarðar norska króna, samsvarar rúmlega 1.000 milljörðum króna.

Samanborið við mars í fyrra hefur afgangurinn af vöruskiptum Noregs aukist um 46%. Í norskum fjölmiðlum kemur fram að það er einkum hátt olíuverð í mars sem eykur þetta myndarlega við afganginn af vöruskiptum landsins. Olía var seld fyrir rúmlega 30 milljarða norskra króna í mánuðinum.