Elia vill losna frá Juventus

Hollendingurinn Eljero Elia er ekkert allt of kátur í herbúðum Ítalíumeistara Juventus og vill komast burt frá félaginu í sumar. Þessi 25 ára leikmaður kom til Juve frá Hamburg síðasta sumar en hefur mátt sætta sig við ansi mikla bekkjarsetu í vetur.

"Ég vil fara frá Juventus. Ég vil njóta þess að spila fótbolta á nýjan leik. Ég hélt kjafti í allan vetur og var alltaf jákvæður út í liðið en fékk samt aldrei sanngjarnt tækifæri til þess að sanna mig," sagði Elia við hollenska fjölmiðla.

"Þar sem ég spilaði ekkert er ég dottinn úr landsliðinu og missi af EM. Það er óhætt að segja að þessi leiktíð hafi verið mistök. Það hefur sært mig en nú verð ég að byrja upp á nýtt annars staðar."